El programa incluye once showcases y va poner el ramu col conciertu de la banda escocesa Capercaillie en La Llaboral

Cuatro talleres prácticos y sesiones formatives completen la programación, ufiertando claves sobre ferramientes dixitales, derechos, movilidá y salú nel ámbitu musical

24/03/2026.- La Conseyería de Cultura, Política Llingüística y Deporte entama una edición nueva de la muestra sectorial Alcuentru Profesional, Música en Rede, que se va celebrar los díes 14, 15 y 16 d’abril en Xixón y que vuelve a asitiar a Asturies como puntu d’alcuentru pa los profesionales de la industria musical.

El Principáu impulsa esta iniciativa cola mirada puesta en siguir fortaleciendo’l sector, xenerar oportunidaes reales p’artistes y empreses y afianzar espacios de trabayu compartíu que dexen texer rede dientro y fuera d’Asturies. La programación incluye 11 conciertos de duración curtia (showcases), onde van participar Tania Pereira, Pablo Valdés Trío, Tuya, Antonio Irún y los Lobos, Tino Di Geraldo Quartet, La Ciudá nel Mar, Asturiana Mining Company, Rubén Alba Band, Los Míticos del Chimborazo, Entós y Rubén Bada. Les actuaciones van repartise en dellos espacios de Llaboral Ciudá de la Cultura, como’l teatru y lo que foron les cocines, y amplíense nesta edición a la ilesia de la Llaboral y a les sales Albéniz y Acapulco, nel centru de la ciudá xixonesa.

Xunto a la música en directo, Música en Rede vuelve poner el focu nos retos del sector. Va haber cuatro meses redondes de debate dedicaes a cuestiones como la igualdá na industria musical, cola participación de Lara Alcázar (Asociación MIM) y Fee Reega; el pasu del aula al escenariu, con Anxo Pintos (ETRAD) y Mario Carrillo (Escuela Música Creativa); o’l diálogu ente lo tradicional y lo contemporáneo, con Xosé Ambás, Leticia Baselgas y Ferla Megía, amás d’una sesión específica sobre internacionalización onde van participar Asturex y Sekuens. Igualmente van celebrase dos alcuentros comerciales ente profesionales, pensaos pa facilitar contactos y abrir víes de collaboración nueves.

El programa complétase con cuatro talleres prácticos y sesiones formatives centraos n’aspectos clave pa la profesionalización; la xestión de derechos musicales, con Inés Cardero (AEDEM) y Miguel Diéguez (SGAE); la movilidá internacional na industria, con Beatriz Ortega (ES Música); o el curiáu de la salú física y mental nel ámbitu artísticu, con Rosana Corbacho y Amaia Carnicer.

Capercaillie, el 16 d’abril nel Teatru de La Llaboral

El ramu d’esta edición de Música en Rede va tar marcáu pol conciertu de la banda escocesa tan prestixosa Capercaillie, una de les formaciones más reconocíes de la escena celta internacional, que va actuar el 16 d’abril nel Teatru de la Llaboral. La so presencia ayuda a reforciar el calter abiertu y conectáu de la muestra y asitia a Asturies nel circuitu de referencia de la música de raíz atlántica.

Capercaillie, formada nos años ochenta n’Escocia y encabezada pola cantante Karen Matheson, afianzóse como una de les bandes más influyentes na renovación de la música tradicional gaélica, combinando soníos tradicionales con arreglos contemporáneos y algamando una proyección internacional bien amplia. A lo llargo de la so trayectoria, el grupu ayudó de manera decisiva a averar la música celta a públicos nuevos y a asitiala nos principales circuitos europeos.

Dende les sos primeres grabaciones tan innovadores, el grupu llevó a cabu xires por más de 30 países de tol mundu, publicó 10 álbumes gallardonaos (con más d’un millón de copies vendíes), actuó y apaeció na película Rob Roy y llogró’l primer tema en gaélicu n’entrar nel top 40, Coisich a Ruin. Dende’l llanzamientu del so últimu álbum, ReLoved, una colección d’arreglos sinfónicos grabaos cola Orquesta Sinfónica Escocesa de la BBC, dexó almirao al públicu en festivales europeos, y escosaron les entraes nos sos conciertos nel Reinu Uníu.

Inscripciones na muestra y entraes pa Capercaillie

El plazu d’inscripción pa profesionales yá ta abiertu al traviés de la web www.musicaenrede.asturiesculturaenrede.es, onde pue consultase’l programa completu.

Les entraes pal conciertu de Capercaillie punxéronse güei a la venta a un preciu de 20 euros con descuentu cola tarxeta del Club Cultura Principáu d’Asturies, y tán disponibles na web www.laboralciudaddelacultura.com, na Recepción de la Llaboral y nel Centru d’Información Turística del Principáu d’Asturies n’Uviéu.

Con esta edición nueva, el Gobiernu d’Asturies da continuidá a una llinia de trabayu sostenida nel tiempu p’acompañar al sector musical, favorecer el so crecimientu y afianzar la cultura como una industria con capacidá de xenerar actividá, emplegu y promoción nel mercáu esterior.