La quinta edición del festival va celebrase del 27 al 29 de payares en Candás

03/08/2026.- La Conseyería de Cultura, Política Llingüística y Deporte abrió’l periodu de solicitúes pa les empreses que quieran participar nel V Reguerada Fest, que se va celebrar en Candás del 27 al 29 de payares.

Pa poder formar parte del festival, les empreses interesaes han comunicar a la Dirección Xeneral d’Acción Cultural y Normalización Llingüística, primero del 31 d’agostu, la so disposición a participar y los sos datos al traviés del corréu electrónicu dxpoliticallinguistica@asturias.org. En concreto, les organizaciones han indicar nel so mensaxe esta información:

• Nome comercial
• Persona de contactu
• Sector (clas de productu)
• Teléfonu
• Señes de corréu electrónicu

El Principáu trabaya yá na programación d’esta quinta edición del Reguerada Fest, un festival dedicáu a iniciatives culturales y empresariales, cola llingua asturiana como referencia. El nome del festival rinde homenaxe a Antón de Marirreguera, nacíu nel conceyu de Carreño y autor de la que se considera la primer obra lliteraria nesta llingua. Esti eventu ufierta a les compañíes la posibilidá de mostrar los sos productos o servicios, y na primer xornada cúntase entamar una gala onde se van dar los primeros distintivos d’Alfaya, la marca asturiana d’usu llingüísticu.

Al traviés d’esti festival, Candás va volver convertise en puntu d’alcuentru de delles disciplines artístiques y del mundu de la empresa y la comunicación nos díes 27, 28 y 29 de payares, con una programación pensada pa tolos públicos.