Programa Asturies

El Camín de Santiago foi dende l’entamu n’Asturies va 1.200 años una exa cultural de conexón de los distintos pueblos d’Europa. L’éxitu de la ruta vieno determináu tanto pol fervor de los pelegrinos por algamar la tumba del apóstol en Compostela como pola conversión del so camín nuna vía que fixo posible’l viaxe d’idees, estilos artísticos y, en definitiva, cultura, per tou un continente primero y agora pel mundu enteru. 

Dende 2019 la Federación Europea del Camín de Santiago afalaga la celebración del Día Européu del Camín, col que se mira de reconocer esa trescendencia internacional de la ruta y el so venceyu cola cultura y el patrimoniu cultural. Hasta ocho países y abondes rexones del continente axúntense a una folixa de la cultura europea que nel casu d’Asturies permite vindicar, amás, el calter iniciáticu de los nuesos caminos de pelegrinación hacia Compostela. 

Nesta edición, el Día Européu del Camín de Santiago celébrase ente’l 6 y el 14 de mayu, con milenta actividaes espardíes per tol continente, dende Lituania a Portugal y dende Italia a los Países Baxos. Nel casu d’Asturies, la collaboración ente’l Principáu  y los conceyos permite perfacer un programa d’actividaes ambiciosu, qu’inclúin rutes guiaes per tolos nuesos caminos xacobeos, visites a monumentos destacaos de la ruta, charres... y una bayurosa variedá d’actividaes musicales, qu’inclúin música de temática pelegrina, teatru, cuentacuentos y narración oral. Les actividaes desendólquense per toa Asturies y nes mesmes, los caminos Primitivu, de la Costa y del Salvador son los auténticos protagonistes, amosando, otra vuelta, la so capacidá de conversión n’exes culturales, alitadores d’una vida cultural rica, de la qu’esta programación ye espeyu.