Últimos VídeosNoticies

15 rutes pa percorrer el patrimoniu cultural y natural asturianu col programa D'itinerarios pel Patrimoniu

Cultura en Rede

La celebración de los 1.300 años de la Batalla de Cuadonga y del Xacobéu tienen protagonismu especial nesta programación

09/03/2022.- 15 rutes pa percorrer el patrimoniu cultural y natural asturianu conformen el programa D'itinerarios pel Patrimoniu qu'empieza esti sábadu 12 de marzu. Esti programa ye un proyectu de la Conseyería de Cultura, Política Llingüística y Turismu, xestionáu pola Sociedá Pública de Xestión y Promoción Turística y Cultural del Principáu d'Asturies, que busca dende’l 2018 visibilizar y facilitar l'accesu del públicu al numberosu y variáu patrimoniu presente en tola xeografía asturiana.

La celebración de los 1.300 años de la Batalla de Cuadonga y del Xacobéu tienen protagonismu especial nestos percorríos que van desenvolvese hasta'l 18 de xunu tolos sábados (sacante'l día 16 d'abril). Asina, los participantes van poder visitar el Santuariu y la Basílica de Cuadonga y Cangues d'Onís o los conceyos de Cabrales y El Valle Altu de Peñamellera, amás de percorrer monumentos y conceyos que'l pelegrín atopa al so pasu nes distintes rutes xacobees que traviesen el Principáu. Tamién va haber rutes pelos Valles del Osu, pel Parque Natural de Redes, per Ponga y Piloña, per Bual y un itinerariu pa conocer el patrimoniu de Llaviana.

Les entraes pa participar en cada ruta, con places llimitaes, tienen un preciu de 18 euros o de 15 euros pal públicu infantil ente 4 y 11 años, grupos de más de 10 persones, visitantes con Pasaporte Cultural o con tarxeta del Club Cultura Principáu d'Asturies. Les localidaes puen adquirise presencialmente nes oficines de Curin Servicios Integrales de Turismu, de llunes a vienres n'Uviéu, y al traviés de la web www.hazteunbus.es. La salida y llegada de tolos itinerarios va realizase n'Uviéu y dalguna de les rutes incluye parada n'Avilés o en Xixón.

 

Percorríos

  • 12 de marzu. El Camín de Santiago de la Costa pela zona central, Avilés y Comarca.
  • 19 de marzu. El Camín de Santiago Primitivu vinculáu a la Cultura Vaqueira.
  • 26 de marzu. Camín del Salvador.
  • 2 d'abril. Valles del Osu.
  • 9 d'abril. Parque Natural de Redes.
  • 23 d'abril. El Camín de Santiago de la Costa pela zona oriental vinculáu a pueblos marineros.
  • 30 d'abril. El Camín de Santiago pel Occidente.
  • 7 de mayu. El Camín de Santiago Primitivu.
  • 14 de mayu. Ponga y Piloña.
  • 21 de mayu. El Camín de Santiago pela Costa pela zona occidental vinculáu a pueblos marineros.
  • 28 de mayu. El Camín de Santiago de la Costa pel Baxu Nalón: indianos y mar.
  • 4 de xunu. El desconocíu patrimoniu de Llaviana.
  • 11 de xunu. Ruta conmemorativa del 1.300 aniversariu de la Batalla de Cuadonga: Cangues d'Onís.
  • 18 de xunu. Ruta conmemorativa del 1.300 aniversariu de la Batalla de Cuadonga: Arenas (Cabrales) y El Valle Altu de Peñamellera.
  • 25 de xunu. Pal interior de la cuenca del Navia: Bual.
Slide 2