Últimos VídeosNoticies

Nueva convocatoria del programa Curtiumetraxes Llaboral Cinemateca

Cine

12/05/2022.- Llaboral Cinemateca abre una convocatoria nueva del programa Curtiumetraxes Llaboral Cinemateca, una iniciativa empobinada a los creadores cinematográficos asturianos o con residencia nel Principáu d’Asturies, puesta en marcha cola mira de valir de plataforma pa la promoción y distribución de la producción rexonal de curtios en certámenes cinematográficos nacionales y internacionales.

Esta convocatoria nueva ta abierta a toos aquellos trabayos con fecha de producción posterior al 1 de xineru del 2021 que s’inscriban na web de Llaboral Cinemateca (www.laboralcinemateca.es) primero de les 12:00 hores del llunes 30 de mayu. Si se presentasen menos de 10 trabayos a esta convocatoria, los curtios recibíos van evaluase na siguiente reunión de la comisión valoradora, igual que los trabayos que se presenten depués d’esta fecha.

Los curtios que s’inscriban van pasar a formar parte del Archivu xeneral de curtiumetraxes asturianos, que Llaboral Cinemateca pon a disposición de programadores, investigadores, profesionales y aficionaos, y van formar parte, amás, del Archivu del Curtiumetraxe Español qu’ellabora la Coordinadora del Curtiumetraxe Español.

Na selección de curtiumetraxes va valorase la orixinalidá y el riesgu de la propuesta, la calidá artística y técnica del trabayu y la participación significativa d’equipu técnicu y actores asturianos. Los curtios escoyíos pola comisión valoradora van pasar a formar parte del Catálogu de distribución de Llaboral Cinemateca que va encargase dos años de la inscripción y presentación cuidada y personalizada de los trabayos nos eventos y festivales más señalaos.

La documentación y materiales riquíos, amás de les bases completes d’esta convocatoria nueva tán disponibles en www.laboralcinemateca.es.

Bases completes de la convocatoria equí.

Slide 2