Últimos VídeosNoticies

El circuitu cultural Cuadonga 2022-Camín de los Santuarios empieza la so programación en Nava

Cuadonga

06/07/2022.- La programación del circuitu cultural Cuadonga 2022-Camín de los Santuarios ponse en marcha esta tarde en Nava cola representación del espectáculu Justina y Jacinta (Camino hacia la Batalla de Covadonga) a cargu de Teatro del Cuervo. El programa Asturies Cultura en Rede de la Conseyería de Cultura, Política Llingüística y Turismu súmase a los actos de conmemoración de los 1.300 años de la batalla de Cuadonga con un circuitu específicu que va desenvolver una docena d’actividaes en cinco conceyos del Camín de los Santuarios.

El programa del circuitu incluye propuestes teatrales, musicales y charles divulgatives qu’hasta’l mes de payares van poner en valor el patrimoniu etnográficu, cultural y paisaxísticu del itinerariu qu’enllacia Cuadonga y la catedral uvieína col monesteriu de Santu Toribiu de Llébana, en Cantabria, al so pasu per Asturies. Les actividaes gratuites van desenvolvese en cinco de los conceyos del Camín de los Santuarios: Cabrales, Cangues d’Onís, Nava, Piloña y Siero.

El circuitu Cuadonga 2022-Camín de los Santuarios Asturies, Cultura en Rede ye un programa de la Conseyería de Cultura, Política Llingüística y Turismu realizáu en collaboración y cofinanciación colos conceyos. Nel 2022 el Gobiernu d’Asturies va invertir un millón d’euros nel desenvolvimientu de los distintos circuitos culturales. Nel casu del circuitu dedicáu a Cuadonga, la inversión autonómica xube a 30.000 euros.

La programación íntegra del circuitu Cuadonga 2022-Camín de los Santuarios incluye propuestes d’artes escéniques, música o charles divulgatives que puen consultase na web asturiesculturaenrede.es.

Programación circuitu Cuavadonga 2022-Camín de los Santuarios:

Justina y Jacinta (Camino hacia la Batalla de Covadonga) de Teatro del Cuervo. 6 de xunetu en Nava y 9 de setiembre en Cangues d’Onís, a les 19:30 hores.

Justina y Jacinta formen una compañía ambulante de teatru y percuerren toles rutes cuntando les histories que lleven nel so carrín, ente elles la Batalla de Cuadonga.

Historia, paisaje y cultura del Camín de los Santuarios de Toño Huerta. 17 de xunetu en Cabrales, a les 18:00 hores.

Al traviés d’una proyección realizada a costafecha pa esta charla divulgativa, va facese un repasu per tol percorríu del Camín de los Santuarios ente Uviéu y l’oriente asturianu, atendiendo sobre manera a los valores históricos, culturales y naturales d’esti percorríu.

Expedición Las Nadies de Hipnótica Circo Teatro. 19 de xunetu en Cangues d’Onís, a les 20:00 hores.

Ida, La Intrépida, domina les artes del circu y la maxa; Lisa Floxa Risa, los instrumentos musicales, y Tita Ortiga apúrrenos tola sabiduría nesti tríu tan simpáticu. Xuntes viaxen con munchu humor descubriendo fazañes creíbles de les muyeres na historia.

Corri, corri. Música tradicional de cámara céltica d’Orquesta Céltica Asturiana. 30 de xunetu en Cabrales, a les 18:30 hores.

Esti conciertu céntrase na música de la zona del oriente d’Asturies per onde va’l Camín de los Santuarios, con temes como’l Corri Corri, el Pericote, la Danza prima de San Roque, temes cántabros y dalgunos temes compuestos por Mento Hevia, como la danza de Cuadonga o la Danza Prima Al pasar el charco. La parte musical va acompañada d’una presentación a cargu de Xurde Morán.

Chanzas, caminos y peregrinos d’Higiénico Papel Teatro. 19 d’agostu en Nava, a les 20:00 hores.

Dos pícaros charranes que fixeron el Camín de los Santuarios delles veces busquen ganar dalgo de comida cuntando la historia de los Santuarios y les sos peripecies per esti Camín, destacando les aportaciones de los reis d’Asturies y la so influencia. Pa facer más amenu’l rellatu, dramaticen la vida y situaciones d’estos monarques tan importantes, y pa esto cunten col acompañamientu musical d’un probe mudu.

Recital Ecos de Covadonga de Tina Gutiérrez. 16 de setiembre en Piloña, a les 19:00 hores; y el 7 d’ochobre en Siero, a les 19:30 hores.

Tina Gutiérrez organizó la producción y edición discográfica de la primer misa con calter concertante dedicada a la Virxe de Cuadonga, que cuntó cola collaboración de la Escolanía de Cuadonga. Nesti conciertu quier reproducise’l mesmu conceptu del llibru-discu editáu naquella ocasión, con una disertación sobre l’heriedu históricu y cultural de Cuadonga y delles partes de la misa acompañaes por pieces tradicionales del repertoriu d’Oratorio para soprano y órgano.

El Camín a Cuadonga al so pasu pel conceyu de... de Cuatro Gotes Producciones. 8 d’ochobre en Cabrales, a les 18:00 hores; y el 15 de payares en Nava, a les 19:30 hores.

Xurde Morán va esplicar cada parada y los atractivos principales del patrimoniu del Camín de los Santuarios, centrándose sobre manera nos elementos del conceyu nel que s’imparte la charla.

El diario perdido de la Ruta de los Santuarios de Blinca Servicios Culturales y de Ocio. 16 de payares en Nava, a les 17:00 hores.

Pelayo y Covadonga fixeron la Ruta de los Santuarios col so diariu de viaxe, pero al llegar a casa les fueyes soltáronse y vuelen llibres per tolos espacios de so casa. Al traviés d’un código QR, una páxina interactiva y unas pistes escondíes, les families van tener que recuperar toles fueyes del diariu y volver vivir el Camín. Una actividá pa descubrir el Camín de los Santuarios, les diferentes paraes, los edificios más representativos y conocer la cultura asturiana tradicional, amás de dellos mitos y lleendes.

Santuarios musicales de Y Griega Records. 21 de payares en Siero, a les 20:00 hores.

El cuartetu de cuerda Concerto creó un repertoriu bien interesante, basándose na sonoridá de la música relixosa y profana dende últimos del sieglu VIII hasta’l sieglu XIV, col que conmemorar los 1.300 años de la Batalla de Cuadonga y poner en valor el Camín de los Santuarios.

Slide 2