02/06/2023.- El programa D’itinerarios pel Patrimoniu ufierta 15 rutes pa conocer el patrimoniu industrial, cultural y natural asturianu hasta’l mes d’avientu.

Un total de 1.819 persones participaron dende’l 2018 y hasta’l mes de mayu pasáu nesti proyectu que busca facilitar l’accesu del públicu al munchu y variáu patrimoniu presente en tola xeografía de la nuestra rexón, un programa impulsáu pola Conseyería de Cultura, Política Llingüística y Turismu y xestionáu pola Sociedá Pública de Xestión y Promoción Turística y Cultural del Principáu d’Asturies.

El Camín de los Santuarios, el patrimoniu industrial y los centros museísticos asturianos tán presentes nes rutes programaes hasta final d’añu. Los participantes pueden facer un percorríu pel Valle del Caudal, pelos conceyos d’Ibias y Degaña, per dalgunos de los recursos naturales y turísticos d’El Franco, Navia y Cuaña o per Castrillón y el Muséu de la Mina d’Arnáu. Tamién va haber itinerarios per Cangues d’Onís y Onís, con posa en Cuadonga y xubida a Los Llagos; per Tapia; pel conceyu de Grandas de Salime, con visita al Muséu Etnográficu y al Muséu y el castro d’El Chao Samartín; per Cangas del Narcea; per Tinéu; per Os Ozcos y Taramundi; per Veiga y pel puertu de San Esteban; per Sotres y Arenas; per El Valle Altu de Peñamellera y per El Valle Baxu de Peñamellera; per Siero, Noreña, Nava y Piloña; y per Xixón, con visita a Llaboral Ciudá de la Cultura, Cimavilla y a la Ciudadela Celestino Solar.

Les entraes pa participar en cada ruta, con places limitaes, tienen un preciu de 20 euros o de 18 euros pa públicu infantil ente 4 y 11 años, grupos de más de 10 persones, visitantes con Pasaporte Cultural o con tarxeta del Club Cultura Principáu d’Asturies. Les localidaes pueden adquirise presencialmente de llunes a vienres na cai Manuel Pedregal, 2 n’Uviéu, y al traviés de la web turismoasturias.es/itinerariospatrimonio. Uviéu va ser el puntu de salida y llegada d’estos itinerarios.

Percorríos

• 3 de xunu. Valle del Caudal
• 10 de xunu. Degaña y Ibias. Places completes
• 24 de xunu. El Franco, Navia y Cuaña. Places completes
• 8 de xunetu. Arnáu
• 15 de xunetu. Cangues d’Onís y Onís
• 22 de xunetu. Tapia
• 12 d’agostu. Grandas de Salime
• 19 d’agostu. Cangas del Narcea
• 26 d’agostu. Tinéu
• 9 de setiembre. Os Ozcos y Taramundi
• 23 de setiembre. Puertos y rules
• 30 de setiembre. Cabrales
• 14 d’ochobre. Peñamelleres
• 4 de payares. Siero, Noreña, Nava y Piloña
• 2 d’avientu. Xixón