Los 11 espectáculos tán abiertos tanto al públicu profesional como a lo xeneral, con entrada llibre hasta enllenar aforu

Les inscripciones pueden facese hasta’l 20 de payares que vien, a les 14:00 hores, al traviés del formulariu disponible na web escenaenrede.asturiesculturaenrede.es

10/11/2025.- La Conseyería de Cultura, Política Llingüística y Deporte entama, cola collaboración de l’Asociación d’Empreses d’Artes Escéniques d’Asturies (EscenAsturies), la tercer edición de la Muestra d’Artes Escéniques Escena en Rede del 24 al 27 de payares en Llaboral Ciudá de la Cultura.

Meses redondes, alcuentros, talleres formativos y una muestra d’espectáculos conformen la programación d’esta muestra sectorial que busca ser un puntu d’alcuentru profesional y comercial pa compañíes y artistes asturianos, programadores y instituciones, amás de dinamizar el sector de les artes escéniques del Principáu, xenerando espacios pal debate y la reflexón.

Nel marcu d’Escena en Rede va analizase al traviés de les meses de debate cómo les compañíes privaes faen proyectos de programación, los criterios al tiempu de programar o la utilidá de les feries na periferia. Va haber dos alcuentros profesionales y talleres sobre Incentivos fiscales y financiamientu alternativu pa les artes escéniques, sobre Mediación de la disciplina de danza y sobre Otres estratexes y recursos pal financiamientu de les artes escéniques: el patrociniu priváu.

Amás el Teatru de la Llaboral, el Teatru Alejandro Casona de la ESAD, la sala 1, les Cocines Vieyes o los esteriores de la Ciudá de la Cultura van ser los escenarios de 11 producciones de compañíes asturianes: Formigues d’Elektrafiktion, Leporem oblivionis o el encanto de olvidar de Meraki Cía, Atra Bilis de Sótano B, Bauh de Proyecto Piloto, Perendi de La Compañía del Alba, Cué de Mar Rojo Teatro, Julieta en verano de Proyecto Julieta, Las embotelladoras de sueños d’Hipnótica Circo Teatro, La Regenta de Kamante Teatro, Malaika de La Sonrisa del Lagarto y Postales Rotas de Zig Zag Danza. Como novedá nesta edición, va cuntase cola participación d’una compañía convidada de Cantabria, Ruido Interno, que va poner n’escena Cervantes Encantado.

El plazu d’inscripción pa participar nes actividaes profesionales de la muestra yá ta abiertu. Les inscripciones pueden facese hasta’l 20 de payares que vien, a les 14:00 hores, al traviés del formulariu disponible na web escenaenrede.asturiesculturaenrede.es. Los espectáculos, con aforu limitáu, tán abiertos tanto al públicu profesional como a lo xeneral, con entrada llibre hasta enllenar aforu.