15/07/2026.- La edición 2027 del festival Celtic Connections, n'Escocia, va tener una relevancia especial p’Asturies, yá que somos la comunidá internacional convidada (spotlight) dientro de la sección Showcase Scotland 2027 del festival. Un protagonismu que, ensin dulda, va dar una mayor visibilidá a la cultura asturiana y, especialmente, a la nuestra creación musical, dexando conocer meyor la nuestra escena nún de los principales alcuentros internacionales dedicaos a la música folk.

Anque l'espíritu de tol festival Celtic Connections ye difundir la música y promover l'alcuentru y les conexones internacionales, la sección Showcase Scotland ye, en particular, l'espaciu específicamente dedicáu al alcuentru profesional de la música folk y tradicional. Al traviés d'esti foru promuévese la busca de nuevos públicos y la participación en circuitos y redes nueves. Pa ello, en cada edición axúntense representantes de distintos países —instituciones, festivales, promotores, programadores y artistes— col envís de fomentar llinies nueves de trabayu collaborativu.

Na edición del Showcase Scotland 2027, los protagonistes van ser seis artistes o formaciones asturianes, que van ser escoyíos pola propia organización del festival. Les actuaciones van tener llugar en Glasgow (Escocia) ente los díes 20 y 24 de xineru de 2027, dientro de la programación oficial del festival. La fecha, l'horariu y l'espaciu concretos de cada actuación van determinase más alantre en función de la programación artística definitiva. Cada proyectu escoyíu pola organización del festival va disponer d'una actuación en directo d'aproximadamente 15 minutos de duración.

Col oxetivu de facer llegar a la organización del festival el mayor númberu posible de propuestes, dende la Conseyería de Cultura, Política Llingüística y Deporte del Gobiernu d'Asturies abrimos una convocatoria de presentación de candidatures pa la escoyeta de los seis artistes o formaciones asturianes que van participar nel Showcase Scotland 2027. Pa ello, habilitóse un formulariu col envís de facilitar el contautu y la información necesaria de cada artista y formación interesaos en participar.

Plazu de presentación de les propuestes:

Les solicitúes van poder presentase hasta les 23:59 hores del vienres 7 d'agostu de 2026 al traviés del siguiente formulariu dixital: https://forms.cloud.microsoft/e/Y2GgME8RJV

En rematando'l plazu, toles candidatures van remitise a la Dirección Artística de Celtic Connections, que va ser la responsable de realizar la escoyeta. El Gobiernu d'Asturies nun va intervenir na valoración artística de les propuestes recibíes.

Enllaz del formulariu:

Les solicitúes tendrán de formalizase al traviés del siguiente formulariu, completando tolos campos solicitaos: https://forms.cloud.microsoft/e/Y2GgME8RJV