Últimos VídeosNoticies

Llaboral Cinemateca patrocina los proyectos cinematográficos nuevos d’Elisa Cepedal, Samu Fuentes y Samuel Fernandi

Cine

Los trabayos de los trés cineastes asturianos escoyéronse ente los 26 llargos y 15 curtiumetraxes presentaos.

21/04/2021.- Los proyectos cinematográficos nuevos d’Elisa Cepedal, Samu Fuentes y Samuel Fernandi resultaron escoyíos nel programa de patrocinios de cineastes asturianos de Llaboral Cinemateca, que promueve la Conseyería de Cultura, Política Llingüística y Turismu. Les sos propuestes escoyéronse ente les 41 presentaes a esta convocatoria, 26 llargos y 15 curtiumetraxes, tanto de ficción como de non ficción, toos de profesionales y creadores del Principáu.

La realizadora Elisa Cepedal presentó’l so proyectu de llargumetraxe El cine, 5, escoyíu pol comité de valoración “pola coherencia ente l’interés y la relevancia del tema y la busca formal y cinematográfica que propón”. Trátase d’una propuesta enraigonada nel territoriu, pero non localista, que busca esplorar la buelga que dexa’l zarru d’un pozu na historia d’un pueblu mineru y de la so comunidá, al traviés d’una mirada cinematográfica arriesgada y autorreflexiva". Esta propuesta va recibir 12.913 euros.

El cine, 5 narra cómo Los Barreros encara’l zarru del pozu Carrio, símbolu del fin d’una industria que marcó’l calter d’un pueblu que s’enfrenta a la despoblación y l’olvidu. Elisa Cepedal recupera l’archivu fotográficu de mediaos del sieglu XX de so güelu Corsino García Alonso que, xunto a testimonios de quien protagonizaron aquelles imáxenes y qu’entá viven, son quién a poner de manifiestu que la memoria perdura.

A mediu camín ente’l cine observacional y el narrativu atópase Los últimos pastores, de Samu Fuentes, que propón el retratu del ocasu d’un mundu a puntu de desapaecer, con sensibilidá y cercanía. Pal xuráu, “destaca la mirada humana y cercana, el respetu y diálogu cola tradición, l’enraigonamientu col universu asturianu, y la so capacidá pa tratar asuntos tan vixentes como la soledá y l’aislamientu”. El llargumetraxe Los últimos pastores va recibir 10.330 euros pal so desenvolvimientu.

Los protagonistes de la película de Fuentes son los hermanos Fernando y Manolo Mier, dos de los postreros pastores que queden en Los Picos d’Europa. Nuna redolada onde munchos nun diben ser quién a sobrevivir, ellos disfruten de la vida. Son lleenda y memoria de Los Picos, al mesmu nivel que l’Urriellu o’l llobu. Una manera de vida y una sabiduría que puen desapaecer con ellos.

Nel apartáu de curtiumetraxes resultó escoyíu Samuel Fernandi y el so proyectu Manual de la siega, un manual cinematográficu sobre la desapaición de la siega non mecanizada que propón un averamientu etnográficu a los usos y maneres de trabayu típicamente esploraos na rexón”. La propuesta, que va recibir 3.466 euros, destaca, a xuiciu del xuráu, “pola orixinalidá del so planteamientu híbridu, a mediu camín ente l’animación esperimental y la imaxe real, y el so xuegu colos manuales d’instrucciones, convertíos equí na fonte de trabayu pa un cine etnográficu de calter innovador”.

El comité de valoración tuvo formáu por Maialen Beloki, subdirectora del Festival de San Sebastián dende’l 2016, Gonzalo de Pedro, programador de cine y profesor universitariu, y Vanesa Fernández Guerra, directora del Festival Zinebi, de Bilbao.

Slide 2