Últimos VídeosNoticies

Cultura echa a andar el circuitu Autores nel camín 2021, protagonizáu por gallardonaos nos premios lliterarios en llingua asturiana

Lliteratura

El programa ábrese con un alcuentru en Les Vegues (Corvera) con Gonzalo G. Barreñada, ganador del Xuan María Acebal de 2019

La Conseyería de Cultura, Política Llingüística y Turismu, al traviés de la Dirección Xeneral de Política Llingüística, anunció la puesta en marcha del circuitu lliterariu Autores nel camín 2021, un programa protagonizáu polos homes y muyeres escritores de la nómina de ganadores de los premios en llingua asturiana.

El primer actu del circuitu, onde van tar presentes el director xeneral de Política Llingüística, Antón García, y l’alcalde de Corvera, Iván Fernández, va facese esti xueves en Les Vegues, en Corvera, y va consistir nun alcuentru col escritor Gonzalo G. Barreñada, premiu Xuan María Acebal nel 2019 cola obra El llar n’orde, dientro de les actividaes del taller de llectura n’asturianu qu’entama’l Serviciu de Normalización Llingüística del conceyu.

El circuitu Autores nel camín busca poner en contactu al públicu asturiano colos autores ganadores de los premios convocaos pola conseyería, los más prestixosos de les lletres asturianes, y propiciar d’esta manera alcuentros, recitales o talleres literarios. La iniciativa ponse en marcha cola participación activa de los Servicios de Normalización Llingüística, y cola intención de la Dirección Xeneral de Política Llingüística d’incorporar la collaboración de biblioteques y cases de cultura.

La puesta en marcha del circuitu taba prevista pal 2020, pero la crisis de la pandemia nun dexó llevalo a cabu. A partir d’esti xueves, coincidiendo cola programación de la Conseyería de Cultura pa la celebración del Día del Llibru, echa a andar cola participación de les persones ganadores de los premios del 2019 y el 2020.

Cultura zarró yá la programación d’Autores nel camín pal primer semestre d’esti añu con alcuentros en Nava, Candás, Llangréu, Colunga, Grau y L.lena, nos que van participar autores como Francisco Álvarez, Inaciu Galán, Vero Suari, Ruma Barbero, Alberto Vázquez, Sidoro Villa o Lafu y Rebeca.

Esti mes de xunu va anunciase la programación del segundu semestre, a la que se van incorporar autores qu’escriben en gallego-asturianu.

Slide 2