Últimos VídeosNoticies

Xunu musical de la mano d’Asturies, Cultura en Rede

Cultura en Rede

Tamién va haber 17 funciones en 14 conceyos nel marcu del circuitu d’artes escéniques y ocho esposiciones d’artes visuales en siete conceyos

01/06/2021.- Xunu va ser un mes musical con una docena d’actuaciones programaes na nuestra rexón de la mano de los circuitos d’Asturies, Cultura en Rede, el proyectu dela Conseyería de Cultura, Política Llingüística y Turismu, que se fai en collaboración colos conceyos asturianos y xestionáu pola Sociedá Pública de Xestión y Promoción Turística y Cultural del Principáu d’Asturies, que tamién inclúi circuitos temáticos d’artes escéniques, artes visuales, cultura tradicional o lliteratura per dellos conceyos del Principáu.

A lo llargo de tol mes va haber música pa tolos gustos y edaes en 12 conceyos. Morricone Pop Orchestra va repasar en Pravia dellos de los temes compuestos y arreglaos pol maestru italianu; Billy Boy y los Ácratas van rindir Tributo a Tino Casal n’Avilés; Body & The Soulers va presentar el discu nuevu, From side to side, en Xixón, y Alberto & García, l’álbum Flores Negras en Corvera. Tina Gutiérrez va tar con Cantarinos pa que suañes en Navia; Tere Rojo y Charly Blanco con Canciones confinadas, en Gozón; y Ana Nebot y Aurelio Viribay con Las canciones de Mª Teresa Prieto: una compositora asturiana por descubrir, en Ribadeva. Nun va faltar la música de cámara con Spanish Brass en Noreña; un proyectu inspiráu nes cultures marítimes del Cantábricu con A Pedreira y la Trobadora del Cantábrico; y la fusión del boleru, tangu, salsa o la bossa nova col jazz con Vaudí en Tinéu. Pal públicu familiar hai Kikirikikí. Canciones pa neños y neñes con Alicia Álvarez en Siero y un concierto de Petit Pop en Cangues d’Onís.

Nel marcu del circuitu d’artes escéniques van facese 17 funciones en 14 conceyos:Niue, under the coconuts d’Escena Apache en Muros de Nalón; El viaje de Dorothy de Fantastique Company n’A Veiga; La loka historia de Frankenstein d’ACAR Teatro del Mundo en Sotu’l Barcu; Voces de Luz de Gas Teatro y X tu culpa d’Escena Apache en Gozón; Swingers d’El Jaleo Producciones Artísticas en Pravia; Grandes ilusiones de José Armas El Ilusionista en Navia, que tamién va representar Ilusiones en Ribeseya; El monstruo revoltijo d’É Vero Teatro en Corvera; Cuentacuadros con Maruja Mallo de Cuéntame un cuadro en Siero; Amanda y les castañes máxiques d’Ambigú Mediabroadcast en Samartín del Rei Aurelio; Con M mayúscula de Kamante Teatro en Mieres; Cantos de fuego de Compañía Vuelta y Media en Llaviana; Cuentos de siempre para niños y niñas de ahora de David Acera, Los cuentos del conejo listo y el tigre de dos bigotes de Grupo de Teatro Los Pintores y Nubes de cuento de Tras la Puerta Títeres en Somiedu; y Xuanón Namoráu de Producciones Nun Tris en Ribadeva.

De la mano del circuitu d’artes visuales van ponese ocho esposiciones en siete conceyos nel mes de xunu. El día 1  inaugúrense les muestres De la escultura a la gráfica. Escultura contemporánea en Asturias llevada a la gráfica de Ediciones Pata Negra en Llanes, onde va quedar hasta’l 28 de xunetu; y Trilogía poética: Al horru de Ediciones Pata Negra en Grau, onde va amosase tol mes de xunu. FugArte, el proyectu artísticu multidisciplinar de l’Asociación de Artistas Independientes Los Purificados, va quedar hasta’l día 3 n’Avilés y va tar del 8 de xunu al 5 de xunetu en Navia; y el trabayu del artista Juan Falcón va poder vese n’E-LIFE en Mieres del 3 al 29 de xunu. Del 4 al 14 de xunu n’Uviéu va amosase Del Paisaje de los acontecimientos al acontecimiento del paisaje, un percorríu pela creación audiovisual de Cristina Ferrández, y Alto La Xavina de Dos Ajolotes Espacio de Arte, coles series fotográfiques feches por Laura Rodríguez alredor de la so casa familiar.  Sinergias. Gráfica I Andando, una reflexón personal de Cristina Moneo y de diez artistes invitaos sobre los espacios interiores al traviés del papel y les técniques d’estampación, va tar del 7 al 27 de xunu en Villaviciosa y sigue abierta hasta’l 13 de xunu en Cangas del Narcea la esposición Evoluciones y Requexos de Guillermina Caicoya Art Projects cola obra d’Adolfo Manzano.

El circuitu de cultura tradicional inclúi 14 actividaes n’ocho conceyos pa xunu. Elisabet Martín Teatro va tar con Cuentos, conseyes y marionetes en Tinéu, Ḷḷena y Cabranes; Proyecto N.O.S. de L-R, en Grau, Tinéu y Sotu’l Barcu; Aladanza Educación y Tradición con Arma’l to horru, en Grau; Fabriok-Fábrica de ocio y producción con Tradicionando, en Siero y Cangues d’Onís; Carlos Alba Cellero con Contábenmelo en casa, en Grau; y Rubén Bada con Entre les cuerdes, en Tinéu. Maite Capín va enseñar la so Ruta primitiva por Asturias a través del vestuario en Llanes y Ástur Paredes va falar sobre L’horru asturianu y l’espíritu de la modernidá: 500 años d’arte tradicional en Grau.

Lo que me contó la Tía Carola de Carlos Alba Cellero en Castrillón; Puppys en Mieres, A Veiga, Llaviana y Llanes; Aprende y crea tú mismo (Cómo hacer un libro infantil) de La Maleta Ediciones en Navia; Animalías e incertidumbre de Gema Fernández en Llanes; y Soy palabra, soy una canción de Musa Cafeína en Siero conformen la programación del circuitu de lliteratura.

Amás, nel marcu del circuitu Autores nel Camín, que pon en contactu al públicu asturiano colos ganadores de los premios lliterarios n’asturianu convocaos pola Conseyería de Cultura, Política Llingüística y Turismu, va haber trés alcuentros: con Francisco Álvarez González en Candamu, con José Ángel Gayol en Corvera y con Ruma Barbero en Carreño.

Amás, 15 conceyos asturianos van ofrecer en xunu cine en versión orixinal subtitulada n’español gracies a La Cinemateca Ambulante, que programa un total de 28 proyecciones esti mes. La comedia irlandesa Dating Amber, el neowestern Bacurau, la conmovedora Y llovieron pájaros y les españoles Plácido –programada  nel marcu del Añu Berlanga- y Obertura de un milagro son los títulos que van poder vese nes 16 sedes que formen parte del ciclu de cine itinerante de xunu.

La programación de los circuitos d’Asturies, Cultura en Rede pue sufrir modificaciones en función de la evolución de la pandemia por Covid-19. Puen consultase les feches, horarios y la información actualizada en www.asturiesculturaenrede.es.

Slide 2