Últimos VídeosNoticies

Convocatoria programa curtiumetraxes Llaboral Cinemateca 2021

Cine

03/06/2021.- Llaboral Cinemateca abre una convocatoria nueva del programa Curtiumetraxes Llaboral Cinemateca, una iniciativa empobinada a los creadores cinematográficos asturianos o con residencia nel Principáu d'Asturies, puesta en marcha cola mira de sirvir de plataforma pa la promoción y distribución de la producción rexonal de curtios en certámenes cinematográficos nacionales y internacionales. Llaboral Cinemateca ye l'espaciu dedicáu al sector creativu cinematográficu y audiovisual promovíu pola Conseyería de Cultura, Política Llingüística y Turismu, al traviés de Llaboral Ciudá de la Cultura.

Esta convocatoria nueva ta abierta a toos aquellos trabayos con fecha de producción posterior al 1 de xineru del 2020 que tean inscritos na web de Llaboral Cinemateca (www.laboralcinemateca.es) primero de les 14:00 hores del llunes 21 de xunu. Si se presentaren menos de 10 trabayos a esta convocatoria, los curtios recibíos van ser evaluaos na xunta siguiente de la comisión valoradora, lo mesmo que los trabayos que se presenten con posterioridá a esta fecha.

Los curtios que s'inscriban van pasar a formar parte del Arquivu xeneral de curtiumetraxes asturianos, que Llaboral Cinemateca pon a disposición de programadores, investigadores, profesionales y aficionaos, y van formar parte, amás, del Arquivu del Curtiumetraxe Español qu'ellabora la Coordinadora del Curtiumetraxe Español.

Na selección de curtiumetraxes va valorase la orixinalidá y el riesgu de la propuesta, la calidá artística y técnica del trabayu y la participación significativa d'equipu técnicu y actores asturianos. Los curtios escoyíos pola comisión valoradora van pasar a formar parte del Catálogu de distribución de Llaboral Cinemateca que, mientres dos años, va encargase de la inscripción y presentación cuidada y personalizada de los trabayos nos eventos y festivales más destacaos.

La documentación y materiales riquíos, según les bases completes d'esta convocatoria nueva, tán disponibles en www.laboralcinemateca.es.

Bases completes de la convocatoria equí.

Slide 2