Últimos VídeosNoticies

La Calle del Agua, ópera prima de la realizadora asturiana Celia Viada Caso, abre la programación de La Cinemateca Ambulante

Cine

El ciclu de cine itinerante de Llaboral Cinemateca incluye un total de 84 proyecciones d'ochobre a avientu, en collaboración colos 20 conceyos participantes nesti proyectu

27/09/2021.- La película documental La Calle del Agua, de la realizadora asturiana Celia Viada Caso, abre la programación trimestral de La Cinemateca Ambulante qu'empieza'l 15 d'ochobre próximu na Sala Loreto de Colunga. La Cinemateca Ambulante ye'l ciclu de cine itinerante de Llaboral Cinemateca, l'espaciu dedicáu al sector creativu cinematográficu y audiovisual promovíu pola Conseyería de Cultura, Política Llingüística y Turismu, al traviés de Llaboral Ciudá de la Cultura. La programación cinematográfica de La Cinemateca Ambulante ta coordinada pol Festival Internacional de Cine de Xixón.

Celia Viada Caso recupera na so ópera prima la figura de Benjamina Miyar, un llargumetraxe sobre la memoria, les imáxenes y les consecuencies del pasu del tiempu que s'articula a partir de la biografía de la pionera de la fotografía n'Asturies. Miyar (1888-1961) llevó una vida poco común na so casa de la Calle del Agua, a los pies de los Picos d'Europa. Fotógrafa y reloxera mientres más de 40 años, formó tamién parte de la resistencia antifranquista. La so vida y la so obra desapaecieron depués de la so muerte. La Calle del Agua, que cuntó cola collaboración de Llaboral Cinemateca pa la so producción y que recibió 7 gallardones nel 58 Festival Internacional de Cine de Xixón, ye l'alcuentru ente dos muyeres que comparten un mesmu llugar en distintos tiempos, l'esbozu d'una semeya que remanez de lo recordao y de lo esmorecío.

Esti trimestre son 20 los conceyos que collaboren con esti programa, que va ufiertar un total de 84 proyecciones, en versión orixinal sotitulada n'español, nes 23 sedes participantes. Amás de Colunga, proyecten el catálogu La Cinemateca Ambulante los conceyos d'A Veiga, Cabrales, Cangas del Narcea, Cangues d´Onís, Castrillón, Gozón, L.lena, Llanes, Llangréu, Nava, Navia, Noreña, Piloña, Ribadeva, Ribeseya, Siero, Tinéu, Valdés y Villaviciosa, un programa qu'incluye'l clásicu Los peces rojos, de José Antonio Nieves Conde, una de les películes más emblemátiques del noir español de posguerra.

La proyección d'esti filme, rodáu en Xixón en 1955, realízase n'homenaxe a la figura del reconocíu director d’arte Gil Parrondo (L.luarca, 1921-Madrid, 2016) nel centenariu de la so nacencia.

 

La Cinemateca Ambulante colos Conceyos con Ciencia

Nel marcu del proyecto Conceyos con Ciencia y en collaboración cola Conseyería de Ciencia, Innovación y Universidá, llega a La Cinemateca Ambulante'l documental Spaceship Earth, de Matt Wolf sobro unos visionarios contraculturales que s'aisllaron mientres dos años nun ecosistema artificial. En 1991, un grupu de partidarios de la contracultura construyó una enorme réplica del ecosistema terrariu llamáu Biosphere 2. Cuando ocho científicos se zarren a vivir dientro d'él, enfréntense a diverses calamidaes ecolóxiques, asina como a acusaciones de tratase d'una secta. La so épica aventura ye tanto una alvertencia como un testamentu sobre'l poder de pequeños grupos de persones de "reimaxinar" el mundu.

Completa'l programa d'esti trimestre'l llargumetraxe El horizonte, de la cineasta suiza Delphine Lehericey, una película que retrata'l final de la inocencia nuna redolada rural azotada pola seca y que s'alzó colos gallardones a Meyor Película y Meyor Guion nos Premios de Cine Suizo 2019. Branu del 76. Una fola de calor ta provocando que'l campu suizo quede seco a toa velocidá. Nun ambiente sofocante, Gus, de trelce años, ve cómo la so redolada y la so inocencia ruémpense: ta viviendo'l fin del so universu familiar.

Información completa de les proyecciones, feches y horarios na web www.laboralcinemateca.es

Slide 2