Faciendo tebeos

Autor: Ruma Barbero

Disciplina: Lliteratura

Descripción:

Nesti proyectu, l’historietista Ruma Barbero va amosar el procesu creativu d’un autor de cómic al xeitu tradicional (guión, bocetu, dibuxu, rotulación, color, entintáu), amás de proponer una práctica yá desendolcada en munchos tallerinos de cómic y que furrula perfectamente pa moces y mozos dende los 10 años hasta persones adultes. La actividá parte de la escoyeta al azar de dellos elementos que tienen d’apaecer nel cómic: un mediu de tresporte, un animal, un sitiu, un personaxe, un xéneru narrativu y un rasgu propiu de la cultura asturiana. Tamién va encamentase l’usu de la llingua asturiana poniendo enfotu nel usu d’onomatopeyes asturianes.

Rumaldo Antón Barbero de Diego, Ruma Barbero, trabaya como dibuxante y guionista de cómic, ilustrador, diseñador gráficu, maquetador editorial, percusionista y lletrista. Ye Llicenciáu en Belles Artes pola Universidá de Salamanca na especialidá d’Escultura y ye miembru fundador de grupos de folk asturianu ente los que rescamplen Felpeyu y ¿Aú?, colos que sigue n’activo.

Foi profesor d’enseñanza secundaria y de la Universidá Popular de Xixón y tien fecho talleres de cómic p’alumnos dende primaria hasta la universidá. Recibió numberosos premios pol so trabayu como historietista, ente los que destaquen el Premiu Tertulia Malory al meyor llibru en llingua asturiana por La Chelita y tres premios Alfonso Iglesias de cómic en llingua asturiana por Manzajú, El viaxe a la lluz y Seltegu.