Belleza doméstica

Autor: Ricardo Villoria

Disciplina: Artes plásticas

Descripción:

Con imáxenes d’oxetos de la vida cotidiana, Ricardo Villoria fainos partícipes del so procesu creativu y de cómo l’artista xestiona la inspiración, cómo descubrir la guapura na contornada más averada, inclusive dientro la nuestra casa. Aprovechando la situación escepcional qu’obliga a los artistes a siguir trabayando ensin los estímulos qu’ufierta la llibertá de movimientu y el mundu esterior, nesti videu reflexona sobre cómo se pue crear en situaciones atípiques como la que nos ta tocando vivir. Una mirada personal que fala del procesu de creación, pero que funciona en sí mesma como una obra de videoarte.

Ricardo Villoria ye un artista asturianu nacíu en Villoria (Llaviana) en 1986. Estudia Gráfica Publicitaria n’Uviéu, onde va empezar a desenvolver la so trayectoria profesional orientada al diseñu gráficu. Depués del so pasu per Londres y Madrid, enancha’l so abanicu artísticu a otres disciplines como la pintura, la fotografía, el videu o la moda. Esta multiplicación de llinguaxes dexó-y enanchar, tamién, los percorríos de los sos trabayos recientes, dende la so primer colección genderless, baxo la marca Petra Von Kant, a la so proyección como director artísticu dientro la escena musical alternativa nacional.