Amelia

Autor: Teresa Marcos

Disciplina: Cine

Descripción:

“Nel añu 31 vieno un andanciu de gripe mui fuerte. Daba a los d’edá mediana, nin a los más vieyos nin a los más mozos. Aquel añu morrieron en Beceña cinco persones, mio pá y cuatro más, d’ente 20 y 50 años”. Asina aveza a empezar el pá de la cineasta Teresa Marcos cuando-y entruga pola historia de so tía Amelia, la so hermana menor, qu’al quedar güérfana de pá diben adoptala Ramón y Marina, qu’emigraren a Cuba y nun teníen fíos. Sentir falar a lo llargo d’años d’una persona ensin otra referencia que les semeyes y les cartes, fai qu’ún acabe por percibir a esa persona como si se tratare del personaxe d’una novela o d’una película. Por eso, un día Teresa Marcos decide dir a Cuba a ver a so tía y grábala cuntando la so versión. Xusto primero del viaxe, grabare a so pá y a so tía María Alicia. Con toes estes grabaciones (d’audiu y videu), semeyes familiares y d’época, y dellos artículos periodísticos sobre ella, la cineasta cúntanos cómo empezó a trabayar nel proyectu de cuntar la historia de so tía Amelia y la so vida en L’Habana.

Teresa Marcos ye llicenciada en Ciencies de la Información pola Universidá Autónoma de Barcelona. Empezó como directora y guionista de los curtiumetraxes Se paga al acto y Lencería de ocasión, nominaos nos Premios Goya en 1995 y 2000, respectivamente. La so filmografía incluye curtios de ficción, documentales, vídeos esperimentales y los llargumetraxes Un contrato extraño (2013) y En modo silencio (2016).