Karaoke

Autor: Pablo X. Suárez (texto), Luis Muñoz, Chino el Indio (música) y Leticia Cienfuegos (audiovisual)

Disciplina: Lliteratura

Descripción:

Primavera de 2020, La Pola Siero, Asturies. Leti (Leti Cienfuegos Fotografía), Chino el Indio (Luis Muñoz, guitarra y voz de Mota Blues) y Suárez (Pablo X. Suárez) conviven nun ruinosu inmueble de la plaza de Les Campes, conocíu na contorna como l’edificiu hippie. La desfecha escalera de castañal, que contempla’l tránsitu cotidianu de los trés artistes, foi guardando nes sos paredes retayos de la so obra ya intrahistoria. Una mañana, al volver de la tienda, Chino atopa nel portal una copia de Karaoke, un poema que Suárez ta duldando si incluyir nuna edición artesanal de la so obra secreta Glories de Poeta Local. Cuando llega a casa, Chino vuelve al instrumentu al qu’arranca una onírica melodía mientres Leti, depués d´un cachu, garra la cámara y fai que les imáxenes del poema, metonimia y metáfora, empiecen a afluyir. Nestes, Suárez queda ensin sal pa cocinar y, al picar en casa los vecinos, lleváu pola estraña emoción del momentu, empieza a rapsodiar.

Pablo X. Suárez ye filólogu especialista en llingua asturiana, amás de rapsoda oral y poeta escritu. Como rapsoda forma parte xunto col productor d’electrónica Dudu García del proyectu El Velcro, amás de collaborar davezu col so vecín Chino el Indio. Publicó los poemarios Pop Retórika y Cómo evitar el apocalipsis en castellán, y Asturiana Beat, El sistema débeme una chocolatina y Little Babilonia n’asturianu. Con estí últimu algamó’l premiu Xuan María Acebal de Poesía n’Asturianu 2017 que concede la Conseyería de Cultura. La so obra narrativa publicada hasta’l momentu ta conteníu nel volume Yoni y yo, Premiu de la Crítica d’Asturiesn esi añu.

Luis Muñoz, conocíu artísticamente como Chino el Indio, ye tituláu en guitarra pol Conservatoriu Superior de Música d’Asturies y alterna’l so llabor como frontman de Mota Blues, banda cola que yá lleva editaos trés notables álbumes qu’entemecen blues, rock, country y psicodelia (Fogata blues en 2013, M en 2015; y Buen Viaje en 2018) con proyectos paralelos como Smooth y la so actividá docente.

Leticia Cienfuegos-Jovellanos Cachero ye diplomada n’Artes de la imaxe fotográfica y Técnica Superior d’Imaxe. Fotógrafa profesional dende va más d’ocho años, afincada n’Asturies depués de 7 años en Madrid, altera el reportaxe y la fotografía social cola fotografía artística y documental. Depués d'acabar los sos estudios superiores entama la so trayectoria profesional d’Asturies collaborando nel rodaxe de spots publicitarios, operaciones quirúrxiques, reportaxes corporativos, etc... Depués, en Madrid, trabaya como asistente de de Cristina García Rodero en dixitalizaciónn, retoque y xestión d’archivu fotográficu, y darréu d’ello, como asistente técnica nel colectivu de fotografía contemporánea Nophoto. Anguaño compatibiliza los sos proyectos artísticos, incluyíu’l campu del videoclip, colos sos servicios profesionales y docentes.