Esti branu la plaza ta ilustrada como un mapamundi de paisaxes suañaos pola mirada y les imáxenes de Ciuco Gutiérrez, un fotógrafu que constrúi la so propia realidá, qu’imaxina por nosotros y pa toos nosotros llugares y situaciones, momentos pa disfrutar. Fotografíes que son namás imaxinaciones, paisaxes enllenos de sol, dacuando señardosos, otres veces enllenos d´inocencia o ironía.

Ciuco Gutiérrez (Torrelavega, Cantabria, 1956) ye un fotógrafu que crea´l so propiu momentu decisivu y que presenta una fotografía construida con un llinguaxe onde´l color agresivo y la ironía son les sos formes d´espresión. Dende l´entamu na década de los 80, el so trabayu xiró alredor de la escenificación d´espacios y llugares onde, partiendo d´una mirada mui íntima na que la imaxinación vien siendo parte fundamental del discursu, represéntase una realidá ficcionada. La so obra tien una gran carga narrativa y lliteraria onde la paradoxa y la metáfora, acompañaes pola ironía y el color, son elementos fundamentales na construcción d´un universu oníricu propiu.