Dende la prehistoria, les sociedaes humanes sintieron la necesidá d´arrodiase d´oxetos bellos y la sociedá rural asturiana nun quedó al marxe d´esta corriente universal. La vida y les viviendes yeren austeres y tenían namás lo imprescindible pa subsistir, pero ello nun foi torga pa que se desenvolviera un arte de lo cotidiano. Los artesanos decoraron toa clase de ferramientes y instrumentos fechos de madera, fierro, fibres testiles, cerámica, cueru y asta. Yeren persones habilidoses que valoraben el trabayu bien fechu y buscaben la guapura, decorando les sos producciones y buscando la proporción afayadiza a los oxetos que fabricaben.

El repertoriu de motivos decorativos que s´emplegaba n´Asturies yera´l común a tol campesináu européu: motivos xeométricos y vexetales de tradición bien antigua; figures humanes, animales y fantástiques; diseños y anagrames relixosos. Dalgunos apaecen n´oxetos y lapides funeraries de la Edá del Fierro y dómina romana. L´empléu de símbolos relixosos tenía una función protectora contra los malos espíritos y otres amenaces. Nun ta tan claro´l significáu de los diseños xeométricos d´inspiración solar (rosetes, tetrasqueles, radiales), qu´en dalgún tiempu tuvieron esa mesma función, pero qu´en tiempos recién ye fácil que s´usaren como pura decoración.

Nesta esposición pue vese una selección d´oxetos decoraos que dexa conocer cómo los llabradores compaxinaben lo útil colo bello. Toos ellos pertenecen a la colección del Muséu del Pueblu d´Asturies.