Circuitu d´actividaes d´artes escéniques

Nun ambiente humilde y sórdidu, na Irlanda de los años 80, nuna sociedá condergada a la emigración, endientro d´un contestu de violencia y crisis idiomática ya identitaria, Maureen Folan, la protagonista, caltién una complicada relación con so madre. Ella tien 40 años y ye virxe, y so madre, Mag, ye práuticamente una inválida, anque según la so fía, desaxera los sos problemes.

Una cenciella invitación pa dir a una fiesta va camudar el destín d´entrambes les dos. Maureen va dir, anque so madre va faer tolo posible pa torgalo, y ellí va alcontrase otra vuelta con Pato Dooley, un vieyu amigu que siempres la consideró «la reina la guapura de Leenane». Los dos van pasar la nueche xuntos (anque nun van llegar a peracabar), y Pato va dici-y que va tener que volver marchar llueu. Ray, l´hermanu de Pato, fai de mensaxeru ente ésti y Maureen, anque los mensaxes nunca lleguen a la so destinataria por aciu de Mag, lo que-y va acabar acarretando consecuencies graves.