Circuitu d’actividaes d’artes escéniques

Basáu nel cuentu de Luis Coloma Ratón Pérez. Un espectáculu prestosu y llamativu que cuenta la historia d´un Rei. Nel reinu hai un turdeburde tremendu y él, solu y desesperáu, ta preparándose pa marchar del país. Entós, una vozuca píde-y que s´alcuerde de cuando yera un neñu. El Rei vuelve cola memoria pa la infancia, pa cuando, como a tolos rapacinos, -y cayó un diente de lleche.

L´alcuentru col mur más famosu fai que s´alcuerde de lo cencielles que puen ser les coses. De que tolo qu´hai que saber aprendémoslo de neños gracies a los cuentos, anque llueu, cuando medramos, escaecémoslo too. Trata de la importancia que tienen les coses menudes que nos pasen cuando somos pequeños y del impactu tan grande que tienen en nosotros cuando nos facemos mayores. Y de que too ello pue cambiar el mundu. Pues cambiar el mundu si yes un rei, pero, si nun lo yes, tamién.