Existe un cine destináu a les audiencies más moces y al públicu familiar que tien como oxetivu, amás de proporcionar entretenimientu y contaxar fascinación, ufiertar a esti públicu conteníos diversos, alternativos y anovadores queyos dexen medrar como espectadores críticos. Una clas de cine que desgraciadamente atopa pocu acomodu nos ámbitos comerciales del audiovisual y que comparte con Llaboral Cinemateca una vocación pola formación d’espectadores nuevos con una mirada más abierta y plural.

Nesta sesión discurrida a costafecha pal públicu infantil y juvenil, axuntamos obres orixinales y estimulantes acorrompinaes d’idees y encantu, munches d’elles con una trayectoria exitosa en festivales nacionales y internacionales.

Duración: 57 min

Ficha completa de la película

Love letters

Una neña ponse murnia cuando pierde la moñeca preferida en dalgún sitiu d’una ciudá bulliciega. A un carteru mui simpáticu ocúrrese-y una manera mui aguda p’ayudar a la neña a superar la perda.

Drops

Una comunidá pequeña de gotes de lluvia nel ciclu del agua, persigue les nubes pa mantenese al día cola lluvia. La grandeza de la existencia revélase cuando sal el sol y descubren que nun hai nada de lo que tener mieu.

And the moon stand stills

La presencia de la lluna aféctanos a toos baxo la so resplandor, pero’l demoniu quier destruyir el mundu pacíficu, afuraca los empiezos y provoca la inundación, y hasta quier comer la lluna ... La película esplora’l ciclu llunar y les enerxíes invocaes pola so resplandor.

Souvenir

Souvenir ye la historia d’un padre y la fía y d’un viaxe insólitu al traviés del tiempu y la memoria. Un percorríu a contrarreló pelos recuerdos d’una vida entera.

Slovo / Farewell

Cansáu y triste, Lovro enllena la bañera. La so mirada va pa una gota d’agua que sal despacio del cañu. Cuando el agua-y cute, recuerda’l día en qu’él y el güelu foron a pescar la primer vez. Los recuerdos llévenlu de vuelta al estanque, los soníos y oxetos en bañu recuérden-y detallinos del día: poner un merucu nel anzuelu, el güelu garrándose’l cazu, conduciendo pal estanque nun coche con un furacu nel chasis.

The Wrong Rock

Un fungu entama una aventura épica pa atopar el so propósitu na vida.

La programación cinematográfica ufiertada por Llaboral Cinemateca ta coordinada pol Festival Internacional de Cine de Gijón/Xixón (Divertia Gijón SA)