Christian Löffler ye un productor, compositor y DJ alemán que ta consideráu ún de los representantes principales de la nueva electrónica emocional. Ye la so música una mezcla d´euforia y señardá, amás de tener un aquel inhóspitu que y val pa conectar col Mar Bálticu y la xeografía del nordeste alemán onde medró. Löffler cofundó en Colonia nel 2008 el sellu Ki Records, onde publicó´l so primer EP, Heights, y nél foi dando salida dende entós a lo más de la so discografía.

Foi col so LP de debú, l´espléndidu A Forest, 2012, una exhibición de techno ambiental, col que trespasó fronteres, repitiendo´l golpe con Mare 2016, onde adoptó un enfoque más orgánicu. Colos sos dos últimos trabayos siguió xubiendo´l llistón: trátase de Lys 2020 y el más que sorprendente Parallels 2021, esti últimu un homenaxe esperimental y electrónicu a Beethoven, onde reellabora dalgunes de les obres orquestales d´esti compositor de lleenda.