Hai una castra d’artistes malos de clasificar, porque la so obra nun se dexa limitar por una etiqueta. Lorena Álvarez (Santantolín, Ibias, 1983) pertenez a esta castra.

“Un versu llibre dientro del panorama musical español”, “cantautora punk”, “un alma inquieta que destila espontaneidá”, “lo más cerca que va tar un artista español de Johathan Richman” son dalgunes de les calificaciones de les que foi oxetu, pero ella sáfase aneciando en nun se convertir nuna lleona adomada obligada a pasar per un aru ardiendo y sigue’l so camín, llibre, derrompiéndolu de la que pasa col convencimientu firme de que la poesía y la música entá tienen daqué que dicir nestos tiempos y sobre manera que l’arte nun s’atopa ónde quieren facenos creyer que ta.

Compositora, productora y intérprete, tamién pintora, depués de la publicación de La cinta (Sones, 2011), el so primer LP Anónimo (Sones, 2012), l’EP Dinamita (Producciones Doradas, 2014), el LP Colección de canciones sencillas (Primavera Labels /Universal Music, 2019) y la composición de la banda sonora del videuxuegu Alba, A Wildlife Adventure del prestixosu estudiu londinense UsTwo Games (2020), Lorena Álvarez, qu’aprució na escena musical como un soplíu d’aire fresco y de manera visionaria esploró y reivindicó les posibilidaes de la música folklórica, foi quién a trespasar les llendes habituales de la música tradicional y asitiala nun contestu nuevu onde la contemporaneidá y la tradición puen dir de la mano ensin complexos. Sobre esta base construyó l’andamiaxe d’una obra que se mueve ente la poesía más delicada y etérea y la conexón cola tierra más fecunda y mullida, enllena de cantares qu’encueyen el corazón, pero engranden l’alma, siempre dende’l so estilu únicu y propiu, tan singular como caúna de les entregues que la cantautora compartió con nós.

Inquieta siempre y na llucha por descifrar los misterios escondíos no más fondo del alma humana, esos que nun camuden nin cola actualidá nin coles modes, surde llibre una riega que percuerre la so obra y nútrela de poesía, filosofía, maxa y revelaciones, de medría personal y espiritual, y con esa regadura floria un xardín de cantares que tienen la propiedá de facenos camudar, de facenos medrar per dientro.