Histories que nacen d´otres; delles reales y otres inventaes, de muyeres que pudieron existir o non, pero que nos dexen venos y ver a otres, dende un prisma distintu, buciando na contradicción, imperfección y vulnerabilidá de cualquier ser humanu. Humanes, ensin más.

Dende histories de muyeres qu´alternen con Lorca, a chigreres que se dexen querer, dende ermitañes arrodiaes de llobos y llobes a estravantes solitaries nun pueblu pequeñu, pasando per aquelles que venguen la muerte d´un ser queríu con otra muerte más.

Muyeres ensin mieu y imperfectes, pero que na so maraviosa y imperfecta esencia, tamién son humanes y muyeres. Como nosotres, como tantes otres.