Proyectu de: Fundación Municipal de Cultura, Educación y Universidá Popular

La historia de la humanidá nun pue esplicase ensin los oxetos qu´ella mesma fabricó. Tienen un valor funcional pero tamién hai un componente estéticu que los vuelve más grandiosos. Puen tener significaos simbólicos, representar los nuestros gustos o´l nuestru estatus social. Puen ser inclusive un reflexu de les nuestres idees, convirtiéndose n´ocasiones nun allongamientu del nuestru propiu cuerpu.

La naturaleza muerta apaez yá nel arte pompeyanu siendo nel barrocu onde algama la máxima espresión colos bodegones onde los oxetos son los protagonistes únicos de la narración pictórica. Más alantre, les vanguardies interesáronse por esti tipu de representación artística que con Cezanne, Picasso, Morandi y tantos otros algamó niveles estraordinarios.

Con Duchamp l´oxetu común llega a adquirir por sí mesmu entidá propia más allá del so usu común, lo que y confier dignidá escultórica en cuantes que volume adscritu a una nueva identidá cultural en rebeldía contra´l tradicional conceptu d´arte visual; el Ready Made.

L´alumnáu de pintura y cerámica de la Universidá Popular convierte l´oxetu en filu conductor pa reinterpretar la realidá dende lo cotidiano. Tresformando los oxetos, dende la mirada del arte, dotándolos asina d´una identidá nueva.

Alicia Soriano Crespo. Profesora de pintura
Laura Soriano Crespo. Profesora de cerámica