La mio casa ta enllena ventanes. Ventanes grandes poles que pasaría un elefante y ventanos per onde nun pasa nin una mosca. Ventanes ciarraes que nun dexen correr l´aire y ventanes abiertes poles qu´entren los páxaros. Ventanes redondes como quesos, triangulares como pirámides, rectangulares como bandexes y hasta una... con forma de lluna. Pero per toes elles: les grandes, les ciarraes, les redondes, les triangulares… Pol güecu de toes… pueo acolumbrar el mundu.

N´iviernu, cuando´l frío ta instalao na cai, prendo la estufa y les ventanes tómense de neblina, y abríguense con millones de gotes de vapor d´agua. Colos deos soi quien a dibuxar unos prismáticos nos cristales tomaos y observar, per ellos, lo que pasa nel mundu. Y equí empieza la nuestra historia.