Traer una obra de primeros del sieglu XX, como lo ye Les tres hermanes, a l´actualidá, supón que´l públicu actual pueda atopar un sentíu nella. Calteniendo la esencia de la obra, contestualicémosla de manera que l´atmósfera resulte tan cercana y conocida pal espectador como son les consecuencies d´un cambéu social y de mentalidá que se dio tres la Guerra Civil, acontecimientu que ye recién na memoria de la nuestra cultura.

Esta época valnos como marcu pa conocer a unos personaxes con mieos, ilusiones, y esmoliciones que nos conviden a cavilgar sobre la complexidá del ser humanu en cualquier momentu de la historia. ¿Vamos tar nel sitiu que nos correspuende? Ye una de les preguntes que caracteriza a esta obra. L´orde social pue limitar y poner difícil el llevar una vida lloñe de lo establecío, como nesti casu viaxar a un país onde rixe una dictadura o ser una muyer independiente. Sicasí, les torgues van más allá de lo que nos arrodia y los mayores conflictos atópense dientro d´ún mesmu. Los personaxes de Todo está allí, malpenes salen de casa y son capaces a cavilgar sobre estes duldes, lo que nun significa que les resuelvan.

Irónicamente, el mundu pequeñu que tendría d´existir ente cuatro parés ye´l mundu que yos pesa sobre los costazos. Vivimos señaldá, murnia y frustraciones, pero esta obra llega más lloñe. Fálanos del amor de distintos tipos, de la identidá, de la muerte, tamién de la dignidá, en resume, temes universales que podemos atopar en caún de nós.