Circuitu d´actividaes de cultura tradicional asturiana

Taller didácticu y participativu nel que se realiza un averamientu a los oríxenes del comportamientu musical de la especie humana, cola demostración d’instrumentos musicales prehistóricos.

Nestes actividaes amuésense, comenten y toquen más de 30 oxetos sonoros, construyíos con materiales procedentes de la naturaleza: güesu, calabaza, exoesqueletos d’animales, plumes, caña, madera, cerámica, frutos vexetales…. Nun falten les flautes de güesu, los xiblatos de falanxes d’ungulaos, bramaderes, raspiadores, sonaxes, trompes naturales, cambiavoces, litófonos, arcos musicales y un completu elencu de preseos primixenios, incluyíes repliques de descubrimientos arqueolóxicos y orixinales.

Proyección de Los orígenes de la música, una película documental dirixida por Jorge Carbajales (Uviéu, 1981) y protagonizada por Pablo Canalís (Uviéu, 1975). Muestra los primeros preseos pensaos pol home, mesmo que los materiales y técniques usaos na so construcción. L’audiovisual desvela pa qué usábemos la música, la so rellación estrecha cola danza y el papel que dambes tuvieron nel desenvolvimientu y supervivencia de la nuestra especie.