Moscoso Cosmos. L’universu visual de Victor Moscoso trai al nuestru país una selección bien amplia del trabayu d’ún de los diseñadores gráficos más orixinales y influyentes del sieglu XX. Axunta l’ablucante serie de cartelos de rock psicodélicu fechos ente 1966 y 1967, que vienen del Conceyu d’A Coruña, y catorce númberos de la revista underground Zap Comix, editada a partir de 1968 y a lo llargo de más de cuatro décades. Amás d’estes dos exes, inclúyese otra selección de cartelos, cubiertes de discos, cómics, ilustraciones pa llibros y revistes, animaciones y semeyes biográfiques que completen un percorríu marcáu por imáxenes icóniques de la segunda metá del sieglu XX.

El catálogu qu’acompaña a la esposición ye la monografía más estensa sobre Victor Moscoso anguaño y incluye una introducción del críticu neoyorkín Steven Heller y un ensayu biográficu de David Carballal, comisariu de la muestra.