Circuitu d’artes escéniques

Un espectáculu musical, una comedia ácida, mordaz, intelixente y prestosísima onde los sos protagonistes, transitando pel musical, el cabaret y el vodevil, van vivir un xuegu d’engaños y desengaños nun mundu enllenu de verdaes falses y mentires verdaderes. De verdá, nun lo pierdan.

La llegada de la pandemia supunxo, ente otres coses, la suspensión d’actividá nos teatros. Trés actrices exitoses de musical, escarmaes de la precariedá, la inestabilidá y l’estrés inherentes a la so vida d’artistes, deciden, énte la situación nueva, apartase voluntariamente de la escena una temporada llarga y formar una comunidá retirada del mundanal ruíu y basada nel disfrute del instante pasaxeru, les bones vibraciones y la paz del espíritu, resumíes nos sos dos principios fundacionales: Kairós y Ataraxa.

Too diba como una seda na comunidá de The Asturian Sisters cuando, de sópitu, el so Responsable Internu d’Actividaes, un tal Leo, dio-y por creyer que yera Leopoldo Alas Clarín y pena un día y otru creyéndose escaecíu inxustamente pola sociedá. Agradecíes polos servicios daos pol so R.I.A. (como Ribeseya lo taría pola so), les nuestres actrices deciden entama-y un homenaxe que lu vuelva al so ser (o nun ser) y al enfotu nel xéneru humanu. Pero los homenaxes cárgalos el diablu. Pasen y vean.