Benjamin Clementine, ganador aclamáu del Premiu Mercury, aterriza n´España en setiembre del 2023 pa presentar el so tercer álbum tan esperáu, And I Have Been, estrenáu esti 28 d´ochobre al traviés de Preserve Artists, el so propiu sellu. Esti trabayu nuevu va dir acompañáu l´añu qu´entra por una segunda parte que podría ser el so últimu álbum: Benjamin muestra ser un artista onde la música ye namás un elementu del so viaxe creativu, sobre manera depués del so papel notable debutando como actor en Dune, la película de Denis Villeneuve ganadora de munchos Oscar.

And I Have Been sigue les aventures de Benjamin como un artista singular qu´ufierta estilu, seguranza y poesía na mesma midida. El so enfoque esperimental y dacuando vanguardista del pop íntimu, amás de la so presencia enigmática, tonu aterciopeláu y vena lliteraria desafíen cualquier clas de categorización.

Temáticamente, And I Have Been trata sobre la vida y el so viaxe impredicible con gafura, tocando l´amor, la perda, el matrimoniu, los fíos y la depresión. Tamién ye una espresión de l´autoconciencia cambiante y de cómo l´enfotu altu en sí mesmu como adultu mozu da pasu aína a la dulda, y en cuenta d´eso vien l´aceptación de que tolos díes tán ehí p´aprender. Benjamin diz: And I Have Been concibióse cuando la COVID. Como toos, tamién encaré munches llecciones, complicaciones y epifaníes rellacionaes con compartir el camín con dalguién especial. Part One namás ta preparando la escena, ye la punta del iceberg qu´establez la escena pa Part Two, que va acullá, con dalgo más fondo.