Cristina Gestido formóse nel Conservatoriu d’Uviéu y treslladóse a Londres pa siguir los sos estudios superiores nel Royal College of Music. Formó parte d’orquestes nacionales y internacionales de sonadía, ufiertó bien de recitales como solista, grabó bandes sonores y collaboró con artistes del altor de Sting. Actualmente trabaya na Orquesta Sinfónica de Bilbao.

Mario Bernardo ye tituláu superior en Música de Cámara y Pianu pol Conservatoriu Superior de Música d’Uviéu. Algamó munchos premios en delles convocatories d’ámbitu nacional y internacional, y actuó per tola xeografía española, tanto de solista como d’integrante de grupos camerísticos. Na actualidá, ye profesor del Conservatoriu Superior de Música d’Asturies.

Música española de los siglos XX y XXI

Nesta propuesta de Gestido y Bernardo destaquen Dos piezas para viola y piano (1981), d’Antón García Abril, y una escoyeta de les Canciones asturianas del mesmu compositor, iguaes instrumentalmente polos intérpretes d’esti conciertu. De la música canaria Laura Vega van interpretar De un lejano amor, que s’estrena nesta versión instrumental. Y van tocar tamién la Sonata n.o 1 para viola y piano, escrita en 1992 por Octavio Vázquez.