Circuitu de música

Esti cuartetu ufierta conciertos didácticos onde la flauta ye l’elementu solista. Canalís usa instrumentos de vientu de los cinco continentes, ente los que destaquen el kaval moldavu, el whistle irlandés, la gaita colombiana o la flauta nativa americana, ente otros inxenios sonoros poco conocíos na nuestra contorna cultural. La so música ye ecléctica y orixinal, fusionando elementos del folk, jazz, sinfónicos y étnicos.

Los conciertos tienen un enfoque divulgativu y didácticu, porque, amás de falar del orixe de los instrumentos usaos y los sos usos tradicionales, cúntense histories rellacionaes colos misterios eleusinos, el tarantismu, los cultos sincréticos, la importancia de la estrella Sirio en cultures ancestrales, la bruxería, los ritos pirofóricos europeos y dalgunes figures mitolóxiques como la caipora tupí-guaraní.