La muestra, qu’entama la Delegación de Defensa n’Asturies en collaboración col Conceyu d’Avilés, presenta la biografía d’ún de los personaxes de más sonadía de l’Armada española del sieglu XVIII, empezando pelos sos oríxenes, pasando peles batalles que lu fixeron merecedor del nomatu de Mediohombre y rematando na batalla que lu convirtió en lleenda en Cartaxena d’Indies (actual Cartaxena, Colombia), onde Lezo foi l’héroe: con seis navíos y poco más de 3.000 homes, venció a les tropes del Almirante Vernon, que buscaba tomar la capital caribeña con una flota ocho veces superior. La esposición reproduz fielmente la bravura y determín na batalla, amás de la so intelixencia, estratexa y astucia militar. La esposición ta complementada con dalgún maniquín y la maqueta de la fragata Blas de Lezo.