La pieza Canción del primer deseo naz del trabayu collaborativu de la compañía con Andrew Bovell a lo llargo de cinco años. Depués de delles residencies de creación y munchos procesos de destilación, naz una pieza testual que se sofita en trés momentos de la historia d’España: 1937, 1969 y el presente. Basándonos en munchos testimonios reales, de les nuestres histories propies y les de los nuestros mayores, más los cientos que, desgraciadamente, s’asemeyen ente elles, Andrew texó una historia tresxeneracional dende lo averao de la nuestra memoria y la distancia de nun encarala dende nengún partidismu, nenguna firida recién, nengún axuste de cuentes de nenguna clas.

El resultáu, ancláu poéticamente na cenciellez de la Cancioncilla del primer deseo, de Federico Garcia Lorca, ye un retratu potente y eléctricu de la nuestra guerra, la nuestra colonización, el nuestru raptu, la nuestra esperanza, el nuestru raigañu y el nuestru futuru. Compartir esti rellatu ficticiu enllenu de verdaes zarra la nuestra triloxía empezada con Cuando deje de llover y siguida por Las cosas que sé que son verdad, y avera la maestría internacional de Bovell, cola bendición de los miembros de la compañía en cada coma y cada idea, a la nuestra propia tierra, vaciada y, sicasí, añagada d’histories y d’escaecimientos.