¿Suañastis dacuando con alcontrar una llámpara maraviyosa que tenga un xeniu? ¿Y qu’esi xeniu seya quién a conceder trés deseos? ¿Pensastis qué deseos
pidiríeis?

Esta historia trata d’una neña llamada Nur y del determín de cumplir el so únicu deséu: que so madre sane de la enfermedá que padez. Por estes coses que tienen los cuentos, Nur atopa una llámpara maraviyosa de la que surde un xeniu. Esti ser maraviyosu pue concede-y trés deseos: fama, guapura, riqueza… pero ella nun nagua por nada d’eso. La pequeña Nur pasa de l’allegría, de mano, a la decepción más fonda, porque’l xeniu namás pue conceder deseos a la persona qu’alcontró la llámpara.

Un espectáculu de títeres y actores, que nos fala de los deseos, del’aceptación y del amor, que ye quién a resalvar les dificultaes que nos presenta la vida.