El ciclu llíricu sigue la so andadura n´ochobre con dos de les trés obres que conformen Il trittico de Puccini: Il tabarro y Gianni Schicchi. Estes dos óperes namás se representaron una vez na nuestra temporada, Gianni Schicchi en 1966 y Il tabarro en 1980.

Hacia 1910, Puccini tuvo la idea de componer una triloxía siguiendo´l Infiernu, el Purgatoriu y el Paraísu de la Divina Comedia de Dante. Il tabarro que vamos ver n´Uviéu ye una pieza tenebrosa y naturalista, basada nel drama de Didier Gold La houppelande (1910), obra de pasu nos teatros de París. El drama, siguiendo l´espíritu d´Émile Zola, reflexa les condiciones terribles de vida de les clases baxes en París, la gran ciudá moderna. La música de Puccini, con influencia del impresionismu francés, reflexa la escuridá y negrura del llibretu, que termina con un crime horrible consecuencia de la traición y l´adulteriu.

La segunda obra del dípticu uviedín ye Gianni Schicchi. Inspirada na commedia dell´arte y la ópera bufa, esta comedia pasó a formar parte d´esta tradición llarga de la lliteratura universal. La familia de Buoso Donati configura un retablu de les debilidaes humanes y los sos miembros personifiquen l´ansia de poder y la hipocresía. Puccini algama al traviés de xestos pequeños y col sofitu de los motivos musicales unos retratos prestosos de los sos personaxes.

La producción procedente de la Ópera de Metz ta dirixida musicalmente pol maestru José Miguel Pérez-Sierra y escénicamente por Paul-Émile Fourny. La orquesta Uviéu Filarmonía y el Coru Titular de la Ópera d´Uviéu completen la producción.