Nel mes de payares llega al escenariu del Campoamor otru dípticu, nesti casu de sabor español dafechu, compuestu por Goyescas y El retablo de Maese Pedro.

Goyescas ye quiciabes una de les obres capitales de la ópera española. El llibretu de Fernando Periquet ta inspiráu n´obres del pintor Francisco de Goya, en concreto n´El pelele (1791-1792), cartón pa tapiz que s´atopa nel Muséu del Prado. Esta obra tien una instrumentación de munchu refinamientu y abonda entidá dramática. Son perconocíos dos de los sos pasaxes: la Canción del Ruiseñor y l´interludiu tan guapu.

El retablo de Maese Pedro, con música y llibretu de Manuel de Falla, básase nel capítulu XXVI de la segunda parte d´El Quixote. Musicalmente´l compositor apártase nesta obra del so color andaluz davezu pa crear un llinguaxe neoclasicista nuevu, apartáu del andalucismu, pero non quitu de referencies nacionales a les músiques históriques del Sieglu d´Oru. A lo llargo d´esti añu celébrase´l centenariu d´esta obra.

La Ópera d´Uviéu y el Teatru Cervantes de Málaga coproducen estos dos cuadros teatrales. El so director d´escena, Francisco López, titula esti dípticu La edad de plata. Díptico español, nun homenaxe claru a dalgunos de los artistes, intelectuales y lliteratos del primer terciu del sieglu XX que protagonizaron ún de los momentos estelares de la cultura española y que tienen na ciudá de París el so refuxu creativu. La orquesta Uviéu Filarmonía va tar dirixida pol maestru valencianu Álvaro Albiach.