Nel mes d’avientu va llegar al escenariu del Campoamor ún de los títulos más famosos y representaos de la historia de la ópera: La traviata de Giuseppe Verdi. Esta ópera forma parte de la triloxía popular xunto a Il trovatore y Rigoletto. El llibretu, basáu na obra La dame aux camélias (1852) d’Alexandro Dumas fíu, nárranos la historia d’amor basada nes propies vivencies del dramaturgu cola prostituta Alphonsine Duplesis. Violetta Valéry, la protagonista de la ópera, sufre les consecuencias d’una sociedá hipócrita y brutal que la destruye.

El montaxe d’esti títulu ye una producción de la Ópera d’Uviéu y del Festival Castell de Peralada. Conformen el repartu nos sos papeles principales la sopranu ruso-ucraína Ekaterina Bakanova, el tenor mexicanu mozu Leonardo Sánchez y el barítonu español Juan Jesús Rodríguez. Al frente d’Uviéu Filarmonía va tar el maestru asturianu Óliver Díaz, y n’apartáu escénicu Paco Azorín va ofrecer una visión nueva del mitu con una mirada feminista, tresformando esta Traviata nun cantar d’amor y llibertá, tan necesarios nestos tiempos en palabres del director d’escena. Completa la producción el Coru de la Ópera d’Uviéu, dirixíu por Pablo Moras.