Referente del pop-art n’España y iconu del arte asturianu por adopción, nel venti aniversariu de la so muerte Eduardo Úrculo (Santurce, 1938-Madrid, 2003) demuestra que la so obra sigue más rellumante y viva que nunca cola esposición Úrculo: El enigma del viajero. La muestra, comisariada pola Dra. Alicia Vallina, supón una metáfora del tránsitu qu’él mesmu adoptó como ún de los motivos principales del so arte. D’esta forma, percorremos el so mundu personalísimu de deseos y fantasíes, sondiando al traviés de les sos obres la naturaleza observadora y infantil que poseía, per aciu de la provocación de lo imaxinario, d’un universu estéticu en movimientu, siempre dialogando cola existencia propia.

Esta esposición quier ser un percorríu pela evolución del trabayu vital d’Úrculo, gracies a una esbilla de cien litografíes, dibuxos, óleos, acrílicos, témperes, escultures en bronce o grabaos provinientes de la colección del so únicu fíu, Yoann Úrculo, y de dellos fondos artísticos particulares, amás d’una selección de ferramientes de trabayu y oxetos personales del artista que somorguien al visitante na atmósfera creadora del pintor que fai escultures, como él mesmu se definía.

En definitiva, una aventura estética que transita peles estremaes etapes del artista, dende la del artista desenraigonáu, gris, desesperáu y a la cata de la continuidá de los primeros años, hasta l’Úrculo viaxeru, misteriosu y silenciosu, entregáu a una visión cosmopolita del arte, pasando poles creaciones informalistes, clandestines, cargaes de deséu y color, sexualidá, erotismu y inmoralidá del so periodu de tránsitu.

Rutas interpretatives:

Los domingos 23 de xunetu, 13 y 20 d´agostu, 10 y 24 de setiembre a las 11:30 h.
la ruta del 24 de setiembre, contará con traducción a lingua de signos española (LSE) en colaboración cola Federación de Personas Sordas del Principaáu d´ Asturies (FESOPRAS).