Muestra nel Pabellón del Principáu d´Asturies na Feria Internacional de Muestres d´Asturies

El pabellón del Gobiernu del Principáu na Feria Internacional de Muestres d´Asturies (Fidma) presenta una esposición sobre la innovación industrial y el desenvolvimientu científicu y tecnolóxicu de la rexón.

Cola mira puesta nel 2033, el Principáu convídate a participar nun viaxe al futuru de la mano d´una ventena d´empreses de les más importantes n´innovación y d´otros centros d´investigación y tecnolóxicos rexonales, que van exhibir dellos proyectos, equipos y dispositivos que se desenvuelven n´Asturies. A lo llargo del percorríu, vas poder conocer les munches aplicaciones de la robótica, la realidá virtual y aumentada, la impresión 3D, los materiales nuevos, la tecnoloxía 5G o l´internet de les coses na industria, la investigación, la salú, l´agroalimentación, la enerxía, el patrimoniu y l´entretenimientu.

Proponémoste trés misiones vinculaes a esta Asturies que desapiega escontra 2033, mui rellacionaes cola nuestra Estratexa d´Especialización Intelixente. Vas deprender dalgo más sobre´l xenoma, los satélites, l´agricultura de precisión, la captura de C02, la xeneración y usu d´enerxía fotovoltaico, los avances tecnolóxicos últimos pa la preservación del Paraísu Natural asturianu y muncho más.

Amás, vas poder ver robós, meteoritos, tierra llunar simulao, un dron terrestre que llucha contra los fueos o un vehículu de zapadores que protexe al Exércitu de Tierra y ta fabricáu n´Asturies. Vas poder esguilar per una cadena d´ADN, contemplar hologrames de pieces históriques, instalaciones audiovisuales de vanguardia y hasta vas conocer a «Duzín», un pez xurásicu atrapáu dientro d´una roca. Y vamos mostrate les bicicletes feches con tecnoloxía altamente innovador coles qu´entrenen los pilotos Fernando Alonso y Carlos Sainz.

Escueyi la misión que más t´interese:
• Vamos llanzar un cohete suborbital y esplorar l´espaciu
• Vamos lluchar contra los fueos y curiar del nuestru paraísu
• Vamos ser agricultores sostenibles y tecnolóxicos

Nun escaezas visitar tol pabellón pa descubrir tolo que preparemos pa ti, qu´incluye esposiciones sobre la imaxe de la ciencia, música, xornaes y una ventena de talleres didácticos y prestosos dirixíos sobre manera a públicu infantil y xuvenil d´ente 3 y 16 años.

Puedes consultar el programa d´actividaes completo equí.