Proyectu de Luis Parades

La esposición acueye los trabayos realizaos por Parades hasta l’añu 2018 y que centren l´interés nel territoriu, entendíu esti como´l puntu de confluyencia ente la naturaleza y lo humano.

Caúna de les obres tien l´orixe na captura, usando moldes, d’improntes garraes de la naturaleza, de manera tala que, caúna d´elles, pue volver al sitiu onde se sacó y acoplase perfectamente a esti.
Como suxer el títulu de la esposición, trátase d’una muestra marcada por dicotomíes fondes que, de dalguna manera, obliguen al espectador a realizar llectures dobles acullá de la contemplación ensin más de les pieces espuestes.

De mano, la solidez del vidru, la so densidá encaxada nun volume compactu, encárase a la so propia fraxilidá, y esto enfatízase nel montaxe coles pieces colingaes sobre estructures metáliques llixeres, nuna inestabilidá aparente.
Lo interior y lo esterior, como conceptos existentes y tanxibles, dilen les fronteres na tresparencia del vidru. Cada obra suxeta a un acabáu formal, nel que Luis Parades retoma nel sentíu más estrictu l´oficiu d’escultor, enzarra una evocación, un paisaxe somorguiáu.