Una esperiencia teatralizada participativa na que vamos averanos a la figura de "l’árbol" en tolos sos aspectos. Vamos percorrer les diferentes etapes na vida d’un árbol, dende’l guañu de la so semiente hasta la muerte y descomposición de la so madera, los aspectos de la so morfoloxía y el so simbolismu ancestral, y vamos descubrir que la so esperiencia vital tá mui venceyada a la nuesa.

La grana sabe esperar ¿Y nós? ¿Cuántu tiempu somos capaces d’esperar pa dexar biltar la nuesa verdadera esencia? ¿Pue sobrevivir un árbol ensin la collaboración ente especies? ¿Podemos facelo nós? Si tuviéremos que rindi-y cuentes a la naturaleza, ¿quién diba xulganos? ¿Sedría embaxo’l texu más llonxevu como facíen antaño los nuesos antepasaos?

La participación, l’humor y l’amor a la naturaleza completen esti percorríu enllenu de matices inesperaos.