El guitarrista Emilio Ribera lidera un proyectu que combina les pasiones musicales que venía desenvolviendo nos últimos años: aunir un llinguaxe jazzísticu col flamencu dende un puntu de vista abiertu, nuna propuesta onde fuere posible atopar tintes de rock progresivu y guiños a munchos estilos. Un abanicu que llévanos del funk a la bossa, del folk asturianu al cantar d’autor… too so’l paragües del cante y los compases flamencos. Solo yera necesario xunir les pieces.

El cantaor David Hernández, el baxista Carlos Laiz y el baterista Manuel Molina son los ingredientes necesarios nesta receta musical, apurriendo talentu, musicalidá y esperiencia a un proyectu que gusta y sorpriende a aficionaos del flamencu y a los que s’averen con interés a esti amiestu d’elementos musicales.