No se dice “ye” se dice “es” ye un documental que va amosar el testimoniu vivu de la represión llingüística exercida na Asturies del franquismu y sobre manera, dientro del sistema educativu, analizando los resortes emplegaos pol franquismu pa la represión del asturianu nes escueles, asina como’l contestu hestóricu que llevó a eses acciones, les sos causes, y sobre manera, les consencuencies xeneraes na sociedá asturiana, con base nos propios testimonios de les persones que vivieron eses situaciones y d’hestoriadores espertos conocedores del momentu. El documental tá basáu nel trabayu previu del director pa la so tesis doctoral «La situación del asturianu nel Franquismu» (2019). 

Esta actividá inclúi la proyección y una charra col director, Inaciu Galán, onde se va esplicar cómo foi’l procesu de documentación ya investigación alrodiu tanto de la tesis como del propiu documental, afondando nes diferentes maneres de represión tanto nos homes como nel casu especial de les muyeres.