Empezamos en Peñaflor, nel conceyu de Grau, onde tanto’l pasu como la ponte del mesmu nome foron cruciales nel Camín Primitivu. D´ehí vamos dir a visitar los esteriores del monesteriu de San Salvador de Corniana, en Salas, cenobiu benedictín que foi un nucleu d´asistencia importante a los pelegrinos a lo llargo de sieglos, y vamos percorrer a pie´l tramu Corniana-Llaniu, unos 4 km.

Depués vamos visitar el cascu históricu de Salas, localidá travesada pol Camín Primitivu, teniendo como exes el castiellu de los Valdés y la Colexata, onde s´atopa´l mausoléu del insigne Fernando Valdés Salas. Desque se xinta, vamos conocer el Muséu Prerrománicu de San Martín, con facsímiles estupendos de beatos y llibros antiguos y pieces procedentes de la ilesia prerrománica de San Martín, de la que vamos ver los esteriores colos sos dos texos milenarios.