Cuarenta y cinco años merecen una celebración. Por eso, el Pabellón del Gobiernu del Principáu na 69 Feria Internacional de Muestres d’Asturies (FIDMA) engalánase anguaño pa celebrar l’aniversariu de l’aprobación del Estatutu d’Autonomía d’Asturies na que va ser la primer posa d’un programa d’actividaes que se va desenvolver nos meses vinientes per tola comunidá autónoma.

Baxo’l lema Asturies yes tu, les persones que nos visiten van descubrir nel estand institucional munches de les coses que más importen, como la sanidá, la educación, los curiaos, la igualdá, la movilidá o’l mediu ambiente; y que tienen la base nel Estatutu. Van poder recordar munchos de los adelantos qu’hubo en pueblos y ciudaes, nes infraestructures, en centros educativos, en centros de salú y n’hospitales, na atención a los mayores, n’ámbitu tecnolóxicu o nel caltenimientu y protección del nuestru “paraísu natural”. Cambeos que dexaron ameyorar la calidá de vida y reforciar la cohesión nel territoriu, garantizando más servicios, más oportunidaes y más bienestar.

Estos primeros 45 años d’Estatutu d’Autonomía son una historia d’éxitu colectivu pal que muncha xente trabayó y apurrió pa construyir Asturies, un día tres d’otru. Por eso, como en toa celebración que se precie, el Principáu da la bienvenida a los visitantes cola recreación d’una romería, espaciu tradicional d’alcuentru, convivencia y tradición.

Dientro’l pabellón, espérente munches esperiencies en primer persona. ¿Quies esperimentar cómo opera un robó DaVinci nos hospitales asturianos? ¿Probar les novedaes na aplicación de la IA nel Principáu? ¿Conocer al primer humanoide desenvueltu n’Asturies? ¿Apetezte un paséu pela historia de La Llaboral? ¿O usar unes gafes de realidá aumentada pa percorrer dalgunos de los museos d’Asturies?

La Radiotelevisión del Principáu d’Asturies, qu’anguaño celebra’l 20 aniversariu, va tener un espaciu propiu y dellos programes en directo. Tamién va haber un área dedicada al audiovisual, con presencia de películes rodaes nel Principáu. Amás de cuntar con videoxuegos retrogamer, dellos photocalls, talleres d’echar sidra y de gastronomía, cuntacuentos, música y xuegos tradicionales, y muestres en vivo d’oficios tradicionales, el públicu del pabellón va poder participar nun xuegu basáu nel programa El Picu de TPA pa llevar dalgún regalu.

Consulta’l programa d’actividaes equí. Namás se precisa reserva de plaza pa les sesiones de l’actividá Escape Room “Esplora Europa” que va ser el día 6 d’agostu. Reserva de places nesti enllaz.