N.E.V.E.R.M.O.R.E. ye una forma d´acudir a la memoria colectiva d´ún d´esos pueblos que podríen borrase del mapa ensin que pase nada. Un pueblu que, sicasí, n´avientu del 2002 nun se dexó convencer poles mentires d´aquellos qu´aseguraben que too diba volver a ser como enantes. Cuntar esta historia ye amás un conxuru pa desfacer el fechizu que sigue arrodiando la catástrofe del Prestige, que pasó frente a les costes gallegues, convertida nuna metáfora estrañamente perfecta d´esa cultura del petroleu que nos quita de ver qué hai más p´allá de la catástrofe, como si nun pudiéremos habitar otru sitiu que nun seya esi.